“Neftçi”nin vitse-prezidenti Qarabağ veteranını işdən uzaqlaşdırması haqda danışmaq istəmədi

Xəbər verdiyimiz kimi, uzun illərdi “Neftçi”də operator kimi çalışan Dadaş Zeynalov heç bir səbəb olmadan vəzifəsindən uzaqlaşdırılıb. Zeynalov bununla bağlı “ağ-qaralar”ın vitse-prezidenti Elnur Məmmədovu ittiham edib. Futbolxeber.az saytı məsələ ilə bağlı “Neftçi”nin vitse-prezidentinin fikirlərini öyrənmək istəyib. Lakin Məmmədov məsələ haqda danışmağa razı olmayıb: “Hazırda iclasdayam. Xahiş edirəm, nə sualınız varsa, klubun mətbuat xidmətinin rəhbəri Gündüz Abbaszadəyə müraciət edin” deyən, Elnur bəyə sualın birbaşa ona aid olduğunu söyləsək də, fikrindən daşınmadı: “Başa düşürəm. Amma Gündüz bəyə müraciət edin. Siz zəng vurduz, mən iclasda olsam belə, telefona cavab verdim”...

Maraqlıdır ki, bu vəzifəyə təyinat aldıqdan sonra Futbolxeber.az saytı 3 dəfə Elnur Məmmədovla telefon əlaqəsi saxlayıb. 1 dəfə ölkə xaricində olan klub rəsmisi, 2 dəfə də “iclasda olub”.