Kaxaber Sxadadze: “Çoxlu zənglər gəlirdi ki, biz mütləq ermənilərə qalib gəlməliyik”

“İnter”in baş məşqçisi Kaxaber Sxadadzenin müsahibəsi

-  Mövsümün sonu Azərbaycandakı işinizi bitirəcəyinizi bildirmisiniz. Ona görə də öncə ölkəmizdəki fəaliyyətinizi qısa analiz etmənizi istərdik.

- Düşünürəm ki, çox uğurlu keçdi. Bu ölkədə işlədiyim müddətdə tək maddi tərəfdən qazanmadıq, həm də işimiz uğurlu alındı. “İnter” kimi böyük klubda gözəl insanlarla işlədim. Azərbaycandakı karyeramdan çox razıyam.

- Azərbaycan futbolunda mənfi və müsbət mənada sizi təəccübləndirən nə oldu?

-  Xoşagəlməz hadisələr haqda danışmaq istəməzdim. Çünki bacardığımız qədər elə şeyləri unutmağa çalışırıq. Ümumi götürəndə jurnalistlərlə aramda olan insidentlərdən başqa mənfi hadisələr olmayıb. Gözəl xatirələr kimi “İnter”in mənim üçün yaratdığı fürsəti qeyd edərdim. Bu klubda mən təkcə baş məşqçi deyildim. “İnter”də istədiyim eksperimentleri aparmaq hüququm vardı. Bu da mənim məşqçi kimi inkişafıma da təkan verdi.

- Bəs, Kaxaber Sxadadze Azərbaycan futboluna nə verdi?

- Qısa şəkildə deyərdim ki, “İnter” kimi bir klubu.

- Azərbaycandakı karyeranız ərzində ən yadda qalan oyun hansı oldu?

- Çox oyunu yada sala bilərəm. Amma belə oyunlardan ən unudulmazı “Birlik” kubokunda Ermənistanın “Mika” klubuna qarşı keçirdiyimiz matç olub. Bundan başqa Avropa Liqasında Polşanın “Lex” və Azərbaycan kubokunun finalında “Xəzər Lənkəran”la oyunlarımızı qeyd edərdim. Penaltilər seriyasında məğlub olduğumuz hər iki matç çox dramatik keçmişdi. “İnter”lə çempion olduğumuz vaxtda da çox güclü komandamız vardı. Həmin mövsüm keçirdiyimiz oyunlar unudulmazdır.

- “Mika” ilə oyunda öncə hansı hissləri keçirirdiniz?

- Bu matçdan öncə çox böyük psixoloji basqı altında idik. Ətrafdan çoxlu zənglər gəlirdi ki, biz mütləq ermənilərə qalib gəlməliyik. Heç vaxt unutmaram. Özüm də çox gərgin idim. Matçdan bir gün öncə gecə saat 4-ə kimi “Mika”nın oyunlarını izləyib, analiz etmişdim. Sevinirik ki, biz onlara heç bir şans vermədik və 4:0 hesabı ilə qalib gəldik.

- Gələcəkdə yenidən Azərbaycanda işləmək ehtimalınız var?

-  Həyatda hər şey ola bilər. Niyə də işləməyim? Mənim bu ölkədə çox gözəl xatirələrim var. Amma hələlik Azərbaycan çempionatında son iki matçımızı və Gürcüstan milli komandasının oyunlarını düşünməliyəm.

- Gürcüstanla Azərbaycan milli komandası arasında yoldaşlıq oyunu keçirilməsini istərdiniz?

- Niyə də olmasın? Çox gözəl olar. Belə bir təklif olsa, dəstəkləyərəm.

-  “İnter”dəki maddi problemlərə görə futbolçuların çoxunun başqa klublara getmək variantı yaranıb.

- Bu, futbolçuların şəxsi işidir. Mən onların qərarına qarışa bilmərəm. Bizim əsas vəzifəmiz onları yetişdirib, Azərbaycan futboluna bəxş etməkdir. Komandamızda da özünü inkişaf etdirən çox futbolçu oldu. Azərbaycan millisinin baş məşqçisi Robert Prosineçki də “İnter”dən hər oyuna 5-6 futbolçu dəvət edir. Bu da onların inkişafından xəbər verir. Bu, mənim üçün də bir fəxirdir. Futbolçularına karyeralarında uğurlar arzulayıram.

- Növbəti turda Azərbaycanda son ən böyük matçınıza çıxacaqsınız. “Qarabağ”la bu oyunda futbolçularınızdan gözlədikləriniz nədir?

- Futbolçularım bu qədər problemlərin qarşısında əllərindən gələni heç vaxt əsirgəməyiblər. Buna görə də onların qarşısında baş əyirəm. Artıq çempionluğun taleyi həll olunsa da, “Qarabağ”la matçdan gözəl dostluq oyunu gözləyirəm.

- “İnter”in maddi durumu yaxşı deyil. Komandanın taleyi necə olacaq?

- Ümid edirəm ki, problemlər düzələcək. Mənim klubun sahibi Cahangir Hacıyevlə həm işgüzar, həm də yaxın dostluq münasibətimiz var. Son görüşümüzdə o, bu qədər problemin qarşısında futbolçularımızın göstərdiyi əzmkarlığa görə onlara təşəkkürünü bildirdi. O da istəyir ki, “İnter” yaşasın və hər zaman iddialı olsun. Amma kimliyini bilməsək də, bu işə mane olan insanlar çoxdur.

- Yəqin ki, belə bir vəziyyətdə “İnter”in çempion olmağı komandaya bir stimul olardı. Sizcə, niyə bunu bacarmadınız?

- Ötən mövsüm də çempionatı ikinci pillədə başa vurmuşduq. Amma həmin vaxt ilk altı oyundan sonra aktivimizdə üç xal vardı. “Qarabağ”la dörd görüşün hamısında məğlub olmuşduq və şansımız yox idi. Bu il isə çox heç-heçələrimiz oldu. Bizdən fərqli olaraq “Qarabağ”da bu qədər xal itkisi olmadı. Buna görə də aramızdakı xal fərqini azalda bilmədik.

- Sonda. “İnter” və Azərbaycandan hansı təəssüratlarla ayrılırsınız?

- Çox gözəl xatirələrlə ayrılıram. Artıq hiss edirəm ki, ölkəniz üçün çox darıxacam. Düzdü, söhbətimizin əvvəlində də qeyd etdiyim kimi, bir az xoşagəlməz hadisələr oldu. Hərdən fikirləşirəm ki, ola bilsin, mən də nəyisə düzgün etməmişəm. İstər jurnalistlər, istərsə də həmkarlarımla olan bu insidentlərdən kimsə incik qalıbsa, onlardan üzr istəyirəm. Çünki belə hadisələr bizim münasibətlərimizə zərər vurmamalıdır. Çox istəyirəm ki, onlar məni hər zaman yaxşı xatırlasınlar. Nə vaxtsa Gürcüstana gəlsələr, onlarla görüşməyə də hazıram.

Mənbə: Qol.az