Aqil Abbas: “Qarabağ”ın “Tvente” ilə oyununda həyəcandan ürəyim getmişdi”

“Qarabağ” bu oyunda qalib gələcək və növbəti tura yüksələcək”. Futbolxeber.az-ın məlumatına görə, bunu açıqlamasında deputat Aqil Abbas deyib.

Millət vəkili bildirib ki, bu oyunu izləyə bilməyəcək: “Ümumiyyətlə, Türkiyə yığmasının və “Qarabağ” klubunun oyunlarına baxa bilmirəm. Bu oyunları izləyəndə çox həyəcanlanıram. “Qarabağ”ın ötən il Hollandiyanın “Tvente” klubu ilə oyununa baxan zaman həyəcandan ürəyim getmişdi. Amma Azərbaycan yığmasının oyununa məmuniyyətlə baxa bilirəm. Çünki bilirəm ki, uduzacaqlar və həyəcanlanmıram”.

Millət vəkili qeyd edib ki, “Qarabağ” bu oyunda qalib gəlsə, hamıya qonaqlıq verəcək: “Bu futboldur və hər bir nəticə ola bilər. Klubumuz qrupda 5 xal toplayıb. “Dnepr” və “Sent-Etien” klubu ilə səfər oyunlarında öz sözünü deyib. “Qarabağ” klubu Avropaya adını yazdırıb. Əminliklə deyirəm ki, bu oyunda qalib gələcəyik. “Qarabağ” “İnter”ə qalib gəlsə, hamıya qonaqlıq verəcəyəm”.