“Xəzər Lənkəran”ın kapitanı: “Avrokuboklara düşməyimiz niyə çətindir ki?”

“Bu dəfə evdə oynamalıydıq. Lakin yenidən Bakıda meydana çıxmalı olduq. Paytaxtda da azarkeşlərimiz bizi dəstəkləyir. Amma doğma divarlar arasında oynamaq daha yaxşıdır”. Futbolxeber.az saytına verdiyi açıqlamada bu sözləri “Xəzər Lənkəran”ın kapitanı Rahid Əmirquliyev deyib.

Premyer Liqanın XV turu çərçivəsində “Qəbələ”ni darmadağın etdikləri oyun haqda danışan Əmirquliyev, süni meydançada oynayarkən çətinlik çəkmədiklərini bildirib: “2 həftədir ki, süni ot örtüklü meydançada məşq edirik. Ona görə də belə vəziyyətə artıq öyrəşmişik. Amma Lənkərandakı oyunlarda stadionda daha çox azarkeş toplaşır”.

Kapitan komandasına inandığını bildirib: “Qəbələ” üzərində vacib qələbə qazandıq. İndi bunun ardını gətirməliyik. Çalışacağıq ki, növbəti oyunlarda da eyni uğura imza ataq. Avrokuboklara düşməyimiz niyə çətindir ki?”