Yaşar Seyidov: “Əgər bu xəbər doğrudursa, o zaman mütləq müvafiq qurumlara müraciət edəcəyik”

“Bakı”nın vitse-prezidenti Yaşar Seyidov komandanın üzvü Yure Travnerin İngiltərənin “Ridinq” klubunda baxışda olması haqda yayılan xəbərlərə münasibət bildirib. Futbolxeber.az saytına verdiyi açıqlamada klub rəsmisi deyib: “Yayılan xəbərlərlə tanışam. Mətbuat vasitəsi ilə bu haqda xəbər tutmuşam. Bizdə olan məlumata görə, Travner Sloveniyadadır. Hər halda sonuncu dəfə əlaqə saxlayarkən o, müəyyən problemlərə görə ölkədən çıxa bilmədiyini bildirdi. Hazırda məsələni araşdırırıq. İlk növbədə Travnerin “Ridinq”in düşərgəsində olub-olmadığını öyrənəcəyik. Əgər bu xəbər doğrudursa, o zaman mütləq müvafiq qurumlara müraciət edəcəyik. Travnerin bizimlə mövsümün sonuna kimi müqavilsəi var. Özbaşına başqa bir kluba keçə bilməz. İnanmıram ki, “Ridinq” kimi peşəkar bir klubda da başqa klubla müqaviləsi olan futbolçunu baxışdan keçirsin”.