Prosineçki: “Xəzər Lənkəran” - “Qəbələ” matçında yalnız 1 komandanın ifasında yaxşı futbol gördüm”

“Səbəbini bilmirəm. Amma həm “Qarabağ”, həm də “Neftçi” sanki çətinlik çəkirdi. Cəmi 45 dəqiqə oyunu izləsəm də, bilirəm ki, ilk yarıda olduğu kimi ikinci hissədə də komandaların az qol şansları olub”. Futbolxeber.az saytına verdiyi açıqlamada bu sözləri milli komandamızın baş məşqçisi Robert Prosineçki deyib.

Xorvat mütəxəssis “Qarabağ” - “Neftçi” oyunu ilə müqayisədə “Xəzər Lənkəran” - “Qəbələ” matçının daha çox bəyəndiyini bildirib: “Qarabağ” - “Neftçi” oyunundan razı qalmadım. Amma “Xəzər Lənkəran” - “Qəbələ” matçında yaxşı futbol gördüm. Təssüflər ki, yalnız bir komandanın ifasında. “Xəzər Lənkəran” çox yaxşı oynadı. Layiqli qələbə qazandılar”.

Prosineçki “Qəbələ”nin heyətindəki milli üzvlərinin çıxışı haqda sualı belə cavablandırıb: “Qəbələ”nin heyətində kiminsə adını çəkmək istəməzdim. Çünki bu gün onların heyətində heç bir futbolçu xoş təsir bağışlamadı”.