Robert Prosineçki: “Xorvatiya mətbuatının illik qazancımla bağlı yazdıqları düzgün deyil” (Müsahibə)

Bu gün Premyer Liqanın 14-cu turu çərçivəsində keçirilən "Bakı” - "İnter" (0:1 )oyunundan sonra millimizin baş məşqçisi postuna əsas namizəd olan Robert Prosineçki jurnalistlərin suallarını cavablandırıb:

- Artıq bir neçə gündür Azərbaycandasınız. İzlədiyiniz matç barədə nə deyə bilərsiniz?

- İzlədiyim bu oyun çox maraqlı idi. Bəzi şeylər var idi ki, onlar dəyişsə, yaxşı olardı. Yəni, bəzi epizodlarda komandalarda daha yaxşı oynaya bilərdi. Ümumilikdə götürsək maraqlı oyun oldu.

- Azərbaycanda hal-hazırda 9 komanda Premyer Liqada mübarizə aparır. Yəqin bilirsiniz ki, bir klub da öz dediklərinə görə, hakim səhvinə görə çempionatdan ayrılıb. Fikriniz necədir?

- Bu günə qədər 3 çempionat oyununu izləmişəm. Hələki məni qane etsə də, 3 oyun azdır. İndiyə kimi nəzər yetirsək, qaneedicidir. O ki qaldı hakimlərə, bu gün hakim idarəçiliyi yaxşı idi. Hələki gördüklərim normaldır. Böyük hakim səhvləri ilə rastlaşmamışam. Kiçik səhvlər olur ki, bu da istənilən çempionatda var.

- "Bakı" - "İnter" matçında oyununu bəyəndiyiniz azərbaycanlı futbolçu kim oldu?

- Bəyəndiyim oyunçular var. Elə bu oyunda da bəzilərini bəyənmişəm. Amma, adlarını demək istəmirəm. Özüm üçün qeydiyyat aparmışam. İzlədiyim oyunlarda bəyəndiklərim var.

- Xorvatiya mətbuatı sizin illik qazancınızı yazmışdı. Bu nə dərəcədə realdı?

-Bu, düzgün deyil. Mən bura oyunları izləməyə gəlmişəm. Hələki müqavilə imzalamamışam. Hələ danışıq aparırıq.

- Bosniya və Hersoqovina millisindən imtina etdiyiniz deyilir. Bu düzgündür?

- Bəli, danışıqlar olmuşdu. Amma, konkret bir şey yox idi. Danışıq səviyyəsində idi. Gördüyünüz kimi, indi Azərbaycandayam və danışıqlar AFFA ilə aparılır.

Mənbə: Futbol11.az