Vüqar Nadirov: “Hakim epizoda yaxın idi, əllə oynasaydım, görərdi” (Müsahibə)

“Qarabağ”ın hücumçusu Vüqar Nadirov “Sent Etyen”lə oyundan sonra Futbolxeber.az saytının Fransaya ezam olunmuş əməkdaşına müsahibə verib.

- “Sent Etyen”ə qarşı baş tutan qarşılaşma haqda nə deyə bilərsən?

- Oyunun çətin keçəcəyini əvvəldən də bilirdik. Elə də alındı. Buna baxmayaraq, bütün gücümüzü meydanda qoyub, 1 xal qazandıq.  

- "İnter" "Dnepr"i məğlub etməklə “Qarabağ”a gözəl şans yaratdı...

- Milandakı matçın nəticəsindən xəbərdaram. Amma tələsmək lazım deyil. Səbrli olmalıyıq. İndi bizi çempionatı oyunları gözləyir. “İnter”lə matça hələ var. Hazırda bu haqda düşünmürük.

- Əvvəldən "Qarabağ"ın sona bir tur qalmış qrupunda ikinci yerdə qərarlaşacağını gözləyirdiniz?

- Təbii ki, arzularımız böyük idi. Komandada hər kəs bir-birinə güvənir.

- Rəqib fərqləndiyiniz epizodda əllə topa toxunduğunuzu əsas gətirərək, hakimə etiraz etdi. Həmin epizod barədə nə deyə bilərsiniz?

- Mən həmin anda əllə oynamamışam. Kənardan elə görünə bilər. Lakin topu çiynimlə qəbul etdim. Hakim epizoda yaxın idi, əllə oynasaydım, dərhal görərdi.

- “İnter”in qrupda birinciliyi təmin etməsi “Qarabağ”ın şansı asanlaşdırır?

- Belə şeylərlə özümüzü aldatmamalıyıq. İlk növbədə oyunumuz haqda düşünməli və maksimum nəticə qazanmağa çalışmalıyıq.

- Epizodların birində “Sent Etyen”in baş məşqçisi Kristof Qaltye sizə etiraz etdi. O epizodda nə baş vermişdi?

- O elə düşündü ki, vaxt aparıram. Lakin belə deyildi. Həmin epizodda həqiqətən də zədələnmişdim. Ayağımda ağrı var idi və buna görə də yerdə qalmışdım.