İlk dəfə Futbolxeber.az-da: Azərbaycan millisinin taleyini vərəqələr həll edə bilər!

17 yaşadək futbolçulardan ibarət komandalar arasında Avropa çempionatının ilkin seçmə mərhələsində ikinci turun oyununda milli komandamız İsveçrəni 2:1 hesabı ilə məğlub edib. Futbolxeber.az-ın məlumatına görə, bu qələbə sayəsində milli komandamız qrupda ikinci pilləyə yüksəlib.

2 turdan sonra yığmamızın aktivində 3 xal var. Lakin hazırda qrupda üçüncü yerdə olan Bosniya və Hersoqovina millisinin də aktivində 3 xal var. Üstəlik, millimiz kimi bosniyalıların da top fərqi 2-4-dür. Yəni, hər iki komandanın göstəriciləri tamamilə eynidir. Son turda isə millimiz elə Bosniya və Hersoqovina ilə üz-üzə gələcək. Əgər, həmin görüş heç-heçə başa çatsa, bu zaman komandaların bütün göstəriciləri eyni olur. Belədə isə ortaya sual çıxır: mərhələni hansı komanda adlayır - Azərbaycan, yoxsa Bosniya və Hersoqovina?

Reqlamentə əsasən komandaların bütün göstəriciləri eyni olduğu halda, alınan vərəqələrə diqqət yetirilir. Yəni, hansı komanda 3 oyun ərzində daha az cəzalanıbsa, o komanda da mərhələ adlayır. Qəribədir ki, 2 turdan sonra bu baxımdan da bərabərlikdir. İlk 2 tur ərzində həm millimiz, həm də bosniyalılar 7 dəfə sarı vərəqəylə cəzalanıblar. Bu isə o deməkdir ki, üçüncü turda oyun heç-heçə başa çatsa, üstəlik hər iki komandadan eyni sayda futbolçu vərəqəylə cəzalansa, o zaman növbəti mərhələ adlayan komandanın adı penatilər seriyasından bəlli olacaq.