“Sifətim qana boyansa da, Rəşad Sadıqovun “Dnepr”lə oyunda geydiyi formanı ukraynalılara vermədim”

Dünən Kiyevdə keçirilən “Dnepr” - “Qarabağ” oyununu canlı olaraq stadiondan izləyən azərbaycanlı azarkeşlərdən biri - Vüqar Rəcəbzadə matçdan sonra ukraynalıların hücumuna məruz qalıb. Hadisə ilə bağlı V. Rəcəbzadə Futbolxeber.az saytına açıqlama verib: “Mən “Neftçi” azarkeşi olsam da, sırf oyuna görə “İmərət” və “Sector 11” qrupunun üzvləri ilə birgə Kiyevə yollandım. Komandamızı sona kimi dəstəklədim və şükürlər olsun ki, “Qarabağ” qələbə qazandı. Oyun bitəndən sonra “Qarabağ”ın və millimizin kapitanı Rəşad Sadıqov formasını mənə hədiyyə etdi. Oyundan sonra uşaqlardan ayrılıb, metroya düşdüm. Qatara minəndə arxamca 6 nəfər də gəldi. Onlar əlimdə formanı görmüşdülər. Həmin ukraynalılardan biri formanı istədi. Təbii ki, vermədim. Dartmaq istəsə də, ala bilmədi. Birdən yanındakı şəxs yumruqla burnuma zərbə endirdi, burnumdan, dodağımdan qan açıldı. Uzun sözün qısası, 6 nəfər üstümə düşdü. Paltarım cırılsa da, sifətim qan olsa da, sona kimi formanı buraxmadım. Nəhayət, qatar növbəti stansiyaya çatanda polis içəri daxil oldu və onlar qaçdılar”.