Tahir Gözəl: "Dnepr"lə Bakıdakı oyunda da qələbə qazansaq, qrupdan çıxmaq işini həll etmiş olarıq”

"Çox sevindirici nəticə oldu bizim üçün. Güclü rəqibə qarşı oynadıq. Çox çətin oyun oldu". Futbolxeber.az-ın Korner.az-a istinadən verdiyi məlumata görə, bu sözləri "Qarabağ" klubunun prezidenti Tahir Gözəl komandasının Avropa Liqasının qrup mərhələsi çərçivəsində bu gecə "Dnepr" (Ukrayna) üzərində qələbəsini şərh edərkən deyib.

Səhər saatlarında Bakıya qayıdan komandasının oyununu stadiondan izləyən klub başqanı bildirib ki, bu, vacib qələbədir: “Bu qələbə münasibətilə cənab prezidentimizi, məşqçi və futbolçu heyətimizi, xalqımızı təbrik edirəm. Komandamız hazırda ikinci pillədədir. "Dnepr"lə Bakıdakı oyuna da yaxşı hazırlaşıb qələbə qazansaq, qrupdan çıxmaq işini böyük ölçüdə həll etmiş olarıq".