Elxan Məmmədov I divizion klublarını incidir ÖZƏL

Futbol üzrə Azərbaycan I Divizionunda mübarizə aparan bir neçə klubun Dövlət Neft Şirkəti tərəfindən maliyyələşməsi sirr deyil. Futbolxeber.az-ın əldə etdiyi məlumata görə, SOCAR tərəfindən I divizion təmsilçilərinə ayrılan vəsait klubara birbaşa deyil, AFFA-nın vasitəsi ilə ötürülür. Bu prosesə işə birbaşa assosiasiyanın baş katibi Elxan Məmmədov nəzarət edir. Baş katib isə son zamanlar I divizion klublarını incidir. Belə ki, Neft şirkəti ayrılan vəsaiti AFFA-nın hesabına köçürsə də, o pullar klublara göndərilməyib. Oktyabr ayı başa çatmaq üzrə olsa da, I divizion təmsilçilərinə hələ ki sentyabr ayının pulu verilməyib. Bir müddət əvvəl də buna bənzər problem yaşanmışdı. Həmin vaxt bu məsələ mətbuata sızsa da, sonradan Elxan Məmmədov klub rəhbərlərinə məlumatı təkzib etmək üçün basqı etmişdi.

Həmin proses indi də təkrarlanır. Hətta qeyri-rəsmi məlumatlara görə, Neft şirkətinin hesabına ayaqda duran I divizion klubları ümumiyətlə çempionatdan çəkilmək istəyirlər. Hazırda klub rəhbərləri də çıxılmaz vəziyyətdə qalıblar. Çünki onlar bir söz deyə bilmirlər. Xəbəri nə təsdiq, nə də təkzib edirlər.

Məsələ ilə bağlı AFFA-nın da mövqeyini öyrənməyə çalışacağıq.