Qurban Qurbanov: “Müdriklər başqalarının səhvləri üzərində öyrənirlər”

“Azərbaycan millisinin tarixinə baxsanız, görərsiz ki bu cür nəticələr əvvəl də çox olub. Demirəm ki, bu cür yenilgilərə öyrəşmək lazımdı. Lakin futbolçuların bu cür vəziyyətdən çıxmaq təcrübəsi var”. Futbolxeber.az-ın Ukrayna mətbuatına istinadən verdiyi məlumata görə, bu sözləri “Qarabağ”ın baş məşqçisi Qurban Qurbanov deyib.

“Dnepr”lə oyunöncəsi mətbuat konfransında Azərbaycan millisinin Xorvatiyaya 0:6 hesabı ilə uduzduğu oyun barədə sualı cavablandıran “Qarabağ”ın çalışdırıcısı, bu cür yenilgilərin futbolçularda böyük təzyiq yaratdığını gizlətməyib: “Bu cür məğlubiyyətlərdən sonra təzyiqlə bacarmaq asan deyil. Xüsusən jurnalistlər və azarkeşlər tez-tez mənfi nəticəni xatırladırlarsa...Lakin bu cür məğlubiyyətlərdən sonra futbolçular özlərində güc taparaq, qarşıdakı oyunlara daha məsuliyyətlə hazırlaşmağa çalışırlar. Odur ki, komandada psixolji durumun qaydasında olduğunu söyləyə bilərəm. Sizi əmin edirəm ki, bu baxımdan komanda yaxşı durumdadır”.

Qurban Qurbanov hansı məşqçidən örnək alması barədə sualı belə cavablandırıb: “Özümü kiminləsə müqayisə edə bilmərəm. Əsk halda, bu işimə mane ola bilər. Hər kəs yolunu özü seçir. Valeri Lobanovskinin işini nümunə göstərmək olar. Onun iş prinsipi hələ də istifadə edilir. Mən hər məşqçidən ən yaxşı cəhəti götürməyə çalışıram. Düz deyirlər: “Müdriklər başqalarının səhvləri üzərində öyrənirlər”.