“Dnepr”in baş məşqçisi: “Qarabağ” hücumda yaxşı təsir bağışlasa da, hər bir komandanın zəif cəhəti var”

Sabah Avroliqanın qrup mərhələsinin üçüncü turu çərçivəsində Kiyevdə “Qarabağ”ı qəbul edəcək “Dnepr”in baş məşqçisi Miron Markoviç oyunöncəsi mətbuat konfransı keçirib. Futbolxeber.az Markoviçin açıqlamalarını ixtisarlarla təqdim edir:

- Sabah hücumda kimə şans verəcəksiniz: Seleznyova, yoxsa Kaliniçə?

- Sizə bütün heyəti deyim? Bəs, burada Azərbaycandan kimsə var?

- Xeyr, ancaq ukraynalılardı.

- Hələ kimə şans verəcəyimi bilmirəm. Son zamanlar həm Seleznyov qol vurur, həm də Kaliniç pis formada deyil. Hələ düşünəcəyik.

- Bəs, Roman Zozulya?

- Baxacağıq, yəqin ki o, “Volın”a qarşı keçiriləcək kubok oyununda meydana çıxacaq.

- “Dnepr”in futbolçuları “Qarabağ”ın güclü rəqib olduğunu qeyd edirlər. Bunu azərbaycanlıların “Sent Etyen”lə oyunu da göstərdi. Siz yəqin ki, rəqibi öyrənmisiniz. “Qarabağ”ın zəif və güclü cəhətləri hansılar?

- “Qarabağ” “Sent Etyen”lə başa-baş oynadı. Şansları olsa da, dəyərləndirə bilmədilər. Rəqib hücumda yaxşı təsir bağışlasa da, hər bir komandanın zəif cəhəti var. Çalışacağıq ki, bundan yararlanaq. Bunun necə alınacağını isə görəcəyik.

- Qapıçı Boyko zədəli deyil?

- Xeyr.