Marko Stanoyeviç: “Qarşımıza şərt qoyulub ki mümkün olsa, Avropada oynayaq, alınmasa...”

“Simurq”un hücumçusu Marko Stanoyeviç Futbolxeber.az saytına müsahibə verib.

- Premyer Liqanın son turunda səfərdə “İnter”lə qolsuz heç-heçəyə razılaşdınız. Oyun barədə nə deyə bilərsən?

- Oyunun çətin keçəcəyini bilirdik. “İnter” güclü komandadır. Bununla belə, meydana qələbə üçün çıxmışdıq. Rəqib topa daha çox nəzarət edirdi. Biz isə müdafiəyə daha çox diqqət ayırmaq məcburiyyətində qalmışdıq. Ümidimizi əks-hücumlara bağlamışdıq. Normal oynadıq. Yalnız istədiyimizi qolu vura bilmədim. Məncə, heç-heçə yaxşı nəticədi.

- Qələbə qolunu vurmağınıza hansı amil mane oldu?

- Müdafiədə xeyli güc itirdik. Buna görə də hücuma istədiyimiz kimi çıxa bilmirdik. Ümumi götürdükdə, normal çıxış etdik. Düzdür, 0:0 hesabını heç kim sevmir. Amma 1 xal da pis nəticə deyil. “İnter”in güclü olduğunu da unutmaq olmaz.

- Artıq Premyer Liqada 8 tur geridə qalıb. Bu müddətdə “Simurq”un çıxışını necə dəyərləndirə bilərsən?

- Çox maraqlı çempionat keçir. Elə vəziyyət yaranıb ki, hər komanda digərini məğlub edə bilər. Biz əvvəl 2 qələbə qazansaq da, sonradan ardıcıl 3 oyun uduzduq. Buna baxmayaraq, “Bakı”nı məğlub edsəydik, ikinci pilləyə də yüksəlmək şansımız olacaqdı. “Sumqayıt”la oyunda geridə olsaq da, toparlanıb qələbə qazandıq. Əsas odur ki, mövsümün sonunda istədiyimiz yerdə olaq.

- Hansı yeri nəzərdə tutursan?

- Qarşımıza şərt qoyulub ki mümkün olsa, Avropada oynayaq. Alınmasa, əsas odur ki aşağı pillələrdə qərarlaşmayaq.

- “Simurq” hələ ki qeyri-stabil çıxışı ilə seçilir. Qeyri-stabilliyin səbəbi nədədir?

- Mən deməzdim ki, “Simurq” qeyri-stabil çıxış edir. Sadəcə, çempion maraqlıdır. Hər oyunu udmaq da olar, uduzmaq da. Oyundan qabaq heç bir komanda “bu gün mütləq 3 xal qazanacağıq” deyə bilməz. Məsələn, biz “Neftçi” ilə oyunda çox gözəl çıxış etdik. Xeyli qol epizodu yaratdıq. Lakin şanslarımızı dəyərləndirə bilmədik və yekunda da məğlub olduq.