“Bakı”nın sabiq qapıçısı: "Foqts nə deyirsə, onu eşidirlər"

"Bakı"nın keçmiş qolkiperi Marko Şarliya Xorvatiya - Azərbaycan oyunu ərəfəsində fikirlərini açıqlayıb. Futbolxeber.az-ın məlumatına görə, 4 il ölkəmizdə çıxış edən Şarliya Azərbaycan futbolu haqda danışıb: "Foqtsun gəlişi ilə Azərbaycanda futbola baxış dəyişdi. O zaman ölkə çempionatında çox sayda legioner çıxış edirdi. Ancaq sonradan çoxluğun tələbi ilə limitdə dəyişiklik edildi, yerli futbolçuların sayı artırıldı, hətta komandalarda iki gənc futbolçunun olması da şərt qoyuldu. Bir sözlə, Foqts nə deyirsə, onu eşidirlər".

Sabiq “Bakı”lı Azərbaycanla oyunda həmvətənlərini diqqətli olmağa çağırıb: "Azərbaycan yığması top-komanda olmasa da, kollektiv oyun baxımından güclüdür. Rəqib topa daha çox nəzarət etməyə, fürsət düşən kimi təhlükəli hücumlar qurmağa çalışır. Ən yaxşı forvardı Rauf Əliyevdir. İtalyanlarla qarşılaşmada onun oyununu gördünüz. Azərbaycanın bəzi klubları Avrokuboklarda qrup mərhələsində oynayıb".

Şarliya Azərbaycanın zənginliyindən də söz açıb: “Azərbaycan paytaxtı Bakının 4 milyon əhalisi var, ölkə neft və qazla zəngindir.  Mən oraya qədəm qoyarkən xoş mənada təəccübləndim. Bakı gözəl şəhərdir, Şərqin Parisi adlandırılır. Yeni yollar, idman qurğuları, stadionlar tikilir".

Mənbə: Supersport.az