“Biz birinci qoldan sonra çaşdıq”

“İndiki “Partizan” daha yaxşıdır. Rəqibin oyun ritminin daha da artdığını söyləməliyəm. Rəqibin fiziki gücü yüksəkdir. Fiziki gücü yüksək olan komandaya qarşı oynamaq isə çətindir. Biz 2:3 hesabı ilə uduzsaq da, şanslarımız olur”. Futbolxeber.az-ın PFL-in rəsmi saytına istinadən verdiyi məlumata görə, bu sözləri “Neftçi”nin kapitanı Flavinyo deyib.

Braziliyalı futbolçu Belqraddakı oyunda arxayınlaşmadıqlarını bildirib: “Hər kəs deyir ki, 2 qol vurduqdan sonra arxayınlaşdıq. Amma, məncə, biz birinci qoldan sonra çaşdıq. Bizim komandamız iki avtoqolla sarsıldı. Lakin unutmayaq ki, bizim erkən vurduğumuz iki qol “Partizan” üçün də biabırçılıqdır. Mən etiraf edirəm ki, səfər oyunun fərdi planda yaxşı oyun sərgiləmədim. Cavab oyununda daha yaxşı oyun nümayiş etdirmək istəyirəm və bunu bacaracağımı düşünürəm. Bizim komandamız cavab oyununa daha yaxşı motivasiya ilə çıxmalıdır. Çünki bizi vacib qarşılaşma gözləyir”.