“Zalsburq”un müdafiəçisi: “Bizim mərhələni keçmək şansımız daha çoxdur”

“Zalsburq”un futbolçusu Andreas Ulmer Çempionlar Liqasının III təsnifat mərhələsinin ilk oyunu çərçivəsində Bakıda “Qarabağ”a 1:2 hesabı ilə uduzduqları görüş barədə danışıb. Futbolxeber.az-ın məlumatına görə, 28 yaşlı sol cinah müdafiəçisi Ağdam təmsilçisindən o cür oyun gözləmədiklərini qeyd edib: “Səfərə qələbə qazanmaq üçün yollanmışdıq. Ancaq qapımızdan buraxdığımız erkən qol planlarımı pozdu. Əvvəldən də “Qarabağ”ın texnikalı və sürətli futbolçulara malik olduğunu bilirdik. Amma bu qədərini gözləmirdik. Onlar fikirləşdiyimizdən də yaxşı çıxış etdilər. Ancaq bizim bir çox epizodlarda bəxtimiz gətirmədi. Əslində hesab oyuna görə olmadı. Qalib gələ bilərdik. Mərhələnin taleyini növbəti oyunda həll etməliyik. Cavab qarşılaşmasında istədiyimiz oyunu nümayiş etdirəcəyik. Bizim mərhələni keçmək şansımız daha çoxdur”.

Xatırladaq ki, “Qarabağ” və “Zalsburq” arasındakı cavab görüşü avqustun 6-da Avtriyada keçiriləcək və Bakı vaxtı ilə saat 23:30-da start götürəcək.