“Neftçi” “Sloveniya sindromu"na son qoydu

Avroliqanın II təsnifat mərhələsində “Neftçi” Sloveniyanın “Koper” klubunu mübarizədən kənarlaşdırıb. Futbolxeber.az-ın məlumatına görə, bununla da “ağ-qaralar” Azərbaycan klubları üçün uğursuz olan ənənəyə son qoyub. Buna qədər təmsilçilərimiz 4 dəfə Sloveniya klubları ilə üz-üzə gəlsələr də, heç bir halda mərhələ adlamaq mümkün olmamışdı. Nəhayət, “Neftçi” özünün 3-cü, ümumilikdə isə 5-ci cəhddə bu ənənəyə son qoyub.

İlk dəfə 2000-01 mövsümündə UEFA kubokunun I təsnifat mərhələsində “Neftçi” öz meydanında “Hit-Qoritsa”nı 1:0 hesabı ilə məğlub etsə də, cavab oyununda rəqibinə 1:3 hesabı ilə uduzub.

Növbəti mövsüm UEFA kubokundakı hər iki təmsilçimizin rəqibi Sloveniyadan olub. “Neftçi” 1 il əvvəl olduğu kimi yenə “Hit-Qoritsa” ilə bacarmayıb - 0:0 və 0:1. “Şəfa”nın çıxışı isə daha bərbad olub. “Olimpiya” “Şəfa”nı əvvəlcə 4, daha sonra isə 3 cavabsız qolla üstələyib.

2012-13 mövsümündə isə Avroliqanın I təsnifat mərhələsində “Mura” “Bakı”nı mübarizədən kənarlaşdırıb. Bakıdakı oyunda qapılara qol vurulmayıb. Sloveniyada isə “Mura” “Bakı”ya şans tanımayıb - 0:2.