“İnter” üçün 110 yaşlı rəqib - "Elfsborq"

“İnter” Avroliqanın ikinci təsnifat mərhələsində İsveçin “Elfsborq” klubu ilə üz-üzə gələcək. Futbolxeber.az-ın məlumatına görə, “bankirlər”in rəqibi Buros şəhərini təmsil edir. “Elfsborq”un əsası 1904-cü ildə qoyulub. Komandanın ləqəbi “Di Gule”dir (“sarılar”).

Uzun müddət sponsor yoxluğundan əziyyət çəkən “Elfsborq” 90-cı illərin əvvəlində bu problemi yoluna qoya bilib. 2010-cu ildə komanda yeni sponsorla müqavilə imzayıb. Bundan sonra klubun sərmayəsi 33 milyon İsveç kronuna çatıb ki, bu da ölkə futbolu üçün rekord göstəricidir.

“Elfsborq” ev oyunlarını 16894 tamaşaçı tutumuna malik olan “Buros Arena”da keçirir. Klubun prezidenti Bosse Yoahnsson, baş məşqçisi isə Klas İngessondur. “Elfsborq” ev oyunlarında sarı-qara, səfər matçlarında isə qırmızı rəngli formadan istifadə edir.

Komanda tarixi ərzində 6 dəfə (1936, 1939, 1940, 1961, 2006, 2013) İsveç çempionu olub, 3 dəfə (2001, 2003, 2013/14) ölkə kubokunu, 1 dəfə (2007) də ölkə superkubokunu qazanıb.

Avroliqaya da “Elfsborq” məhz ölkə kubokunun qalibi kimi qatılıb. Hazırda davam edən Isveç çempionatında “İnter”in rəqibi 13 turdan sonra dördüncü yerdədir.