“Tiraspol”un baş məşqçisi yenə azərbaycanlı jurnalistləri boykot etdi EKSKLÜZİV

“Tiraspol”un baş məşqçisi Vlad Qoyan bu gün “İnter”ə qarşı keçiriləcək oyundan sonra da mətbuat önünə çıxmayacaq. Futbolxeber.az-ın məlumatına görə, moldovalı mütəxəssis oyundan əvvəl olduğu kimi, qarşılaşmadan sonra da danışmaqdan imtina edib.

“Tiraspol” rəsmiləri Qoyanın bu addımının konkret səbəbini açıqlamayıblar. Klubun mətbuat xidmətinin rəhbəri Vadim Kolçev Futbolxeber.az saytına verdiyi açıqlamada bildirib ki, UEFA oyundan əvvəl və ya sonra mətbuat konfransının təşkilini məcburiyyət kimi klubların qarşısında şərt qoymayıb. Məhz bu səbəbdən də Qoyan Bakıda mətbuat önünə çıxmaqdan imtina edib.

Lakin əldə etdiyimiz məlumata görə, səbəb tam başqadır. Belə ki, Moldovada baş tutan oyundan əvvəl “İnter”in məşqçilərindən heç kimin mətbuat önünə çıxmaması Qoyanın xoşuna gəlməyib. Buna görə də 53 yaşlı məşqçi Bakıda mətbuat nümayəndələrinin suallarını cavablandırmaqdan imtina edib.