"Şiroki Briyeq" - "Qəbələ" matçında təmsilçilərimiz üçün uğursuz hakim

Xəbər verdiyimiz kimi, Avroliqanın birinci təsnifat mərhələsinin cavab oyunu çərçivəsində keçiriləcək "Şiroki Briyeq" - "Qəbələ" matçını idarə edəcək hakimin adı artıq bəllidi. Qarşılaşmada ədaləti slovakiyalı referi Vladimir Vnuk qoruyacaq.

Futbolxeber.az-ın məlumatına görə, Vnuk bu günə kimi 3 dəfə Azərbaycan millisinin oyunlarını idarə edib. Amma bu oyunlarda millimiz nəinki qələbə qazanıb, heç qol belə vura bilməyib.  

2009-cu ildə U-17-lər arasında Avropa çempionatının seçmə mərhələsi çərçivəsində baş tutan Azərbaycan - Lüksemburq (0:0) və Xorvatiya - Azərbaycan (3:0) görüşlərini Vnuk idarə edib.

1 il sonra slovakiyalı referinin yolu yenidən U-17 millimizlə kəsişib. Bu dəfə onun idarə etdiyi görüşdə yığmamız Portuqaliyaya 0:2 hesabı ilə uduzub. Bu 3 oyunda Vnuk millimizin üzvlərini 8 dəfə sarı vərəqəyələ cəzalandırıb.