Ramin Musayev: "Adım, soyadım mətbuatda qıcıq yaradır"

Peşəkar Futbol Liqasının (PFL) prezidenti Ramin Musayevin müsahibəsi

- 2 iyul nə günüdür?

- Peşəkar Futbol Liqasının yaranmasından 6 il keçir.

- Bu gün başqa əlamətdar hadisə ilə də qeyd olunur…

- Ramin Musayevin xəstəxananı tərk etməsi günü? (gülür)

- 1924-cü ilin iyulun 2-də Fransanın paytaxtı Parisdə Beynəlxalq İdman Mətbuatı Assosiasiyası (AİPS) yaradılıb. Məhz həmin gündən 90 il keçir. O vaxtdan iyulun 2-si Beynəlxalq İdman Jurnalistləri Günü kimi qeyd olunur.

- Eləmi? Təbrik edirəm.

- Təbrik qarşılıqlıdır. Bu 6 il ərzində PFL prezidenti kimi hansı vacib işi həyata keçirə bilməmisiniz?

- Vallah, çox şey etmək istəmişəm. Amma etmək istədiklərimdən alınmayanı da olub, alınanı da. Hazırda Türkiyə Futbol Federasiyası ilə danışıqlar gedir. Danışıqlara əsasən, azərbaycanlı futbolçular Superliqada, türkiyəlilər isə Topaz Premyer Liqasında oynayacağı təqdirdə legioner statusu daşımayacaqlar. Bunun üzərində iş aparırıq.  

- Bu məsələ nə vaxt reallaşa bilər?

- Allahın köməkliyi ilə bu həftə həll olunmalıdı. Çalışırıq ki, bu mövsümə həmin qayda tətbiq edilsin.

- Fəaliyyətiniz dövründə hansı kluba qarşı hakim ədalətsizliyi daha çox olub?

- Hazırda dünya çempionatı gedir. Özünüz də görürsünüz ki, mundialda nə qədər hakim səhvləri olur. Əsas odu ki, hazırda aramızda qərəzli səhvlərə yol verən hakimlər yoxdu. Bunu tam əminliklə deyirəm. Ancaq hər bir kluba qarşı səhvlərə yol verilib. Səhvsiz hakimlik mümkün deyil. Məncə, klublardan soruşmaq lazımdır ki, bizim işimizdən razıdırlarmı? PFL yarananadək ölkənin klub reytinqi 108-ci yerdə idisə, bu gün 43-cü pillədədi. Təbii ki, bunda PFL-in zəhməti var. Əfsuslar olsun ki, bunu mətbuat işıqlandırmadı. Ancaq bunu elə özümüz qeyd etdik. Bilmirəm, nəyə görəsə bu haqda yazmadılar. Yəqin, Ramin Musayev olduğuma görə işıqlandırmaq istəmədilər.

- Ramin Musayev personasının mətbuatda qıcıq yaratdığını düşünürsünüz?

- Bəli, belə çıxır ki, adım, soyadım mətbuatda qıcıq yaradır. Başqa nəyə görə ola bilər ki? Halbuki, 1 komandamız yoxlama oyununda 1:0 hesabı ilə qalib gəlir və ya heç-heçə edirsə, onu elə işıqlandırırlar ki... Amma ötən il dünya reytinq sıralamasında birdən-birə çempionatımız 60 pillə irəlilədi, rekord vurdu...

- Saytımız bu haqda xəbər yazıb...

- PFL-in rolunu qeyd etmədiniz. Halbuki, PFL-in əziyyəti olmasa, bu yerə qalxmarıq. Yəni, bunu mən şərt kimi demirəm. Sizin sayta, rəhbərliyinizə böyük hörmətim var. İnsan uman yerdən küsər. Ancaq tarix tarixdi. Ramin Musayevin yerinə bir başqası, İvan Petrov gəlsə də, onsuz da bu uğur bizim adımıza yazılacaq. Mən tərifin əleyhinəyəm. Ancaq ən azından görülən işləri danmaq olmaz.

- Bu gün həm sizin, həm də idman mediası üçün əlamətdar gündü. PFL prezidenti kimi, kənardan baxanda idman mətbuatı necə görünür?

- Topaz Premyer Liqasına uyğun jurnalist azdı. Yəni, eləsi var ki, nəyinsə xətrinə jurnalistlik edir, amma eləsi də var ki, adam onun saytını oxuduqca ləzzət alır (gülür).

- Sabahdan komandalarımız avrokuboklara start verəcək. Şanslarımızı necə dəyərləndirirsiniz?

- Dünya çempionatının oyunlarına baxandan sonra adam proqnoz verməyə çəkinir. Yalnız deyə bilərəm ki, ötənilki ilə müqayisədə bu dəfə püşkatma bizim üçün düşərli oldu.

- “Qəbələ”nin rəqibi “Şiroki Briyeq” sizə yaxşı tanışdı...

- Bəli. Bu komanda ilə mən “Neftçi”də vitse-prezident işləyən vaxt qarşılaşmışıq. Səfərdə 1:2 uduzsaq da, Bakıda 1:0 hesabı ilə qalib gəlib mərhələ keçmişdik.

- “Şiroki Briyeq” məhz “Neftçi” ilə qarşılaşdığı 2004-cü ildən bu yana ardıcıl Bosniya və Herseqovinanı avrokuboklarda təmsil edir. “Qəbələ” isə Avropada debütantdı. “Qəbələ”nin işinin daha çətin olduğunu düşünmürsünüz ki?

- “Qəbələ” rəhbərliyi, məşqçi və futbolçularına sizin, mənim kimi azarkeşlər öz dəstəyimizi verməliyik. Komandamız ən azından Qəbələdə qalib gəlməlidir.

- Dünya çempionatında azarkeşlik etdiyiniz komanda varmı?

- Hazırda azarkeşlik etdiyim komanda yoxdu. Çünki azarkeşi olduğum İspaniya yığması gözlənilmədən qrupda qaldı. Özlərini göstərə bilmədilər. İspaniyadan sonra müsəlman dövləti olduğu üçün Əlcəzairə azarkeşlik etdim.