Stanislav Namaşko: “Xəzər Lənkəran”da baxışda olduğum yalandır” EKSKLÜZİV

Moldova millisinin qapıçısı Stanislav Namaşko “Xəzər Lənkəran”da baxışda olub bəyənilmədiyi, eləcə də AZAL-a keçəcəyi haqda yayılan xəbərlərə aydınlıq gətirib. Futbolxeber.az saytına verdiyi eksklüziv açıqlamada 27 yaşlı qolkiper deyib: “Xəzər Lənkəran”da baxışda olduğum və bəyənilmədiyim haqda xəbərlər yalandır. Buna qədər mən heç vaxt Azərbaycan klubları ilə danışıqlar aparmamışam. Yayılan xəbərlərin heç bir əsası yoxdur. O ki qaldı AZAL-a, bu məsələ hələlik açıq qalır. Hazırda mən evimdəyəm və istirahət edirəm”.

Qeyd edək ki, moldovalı qolkiper karyerasına vətənində - “Tiraspol”un heyətində başlayıb. Daha sonra “Şerif”də çıxış edən Namaşko, 2010-2013-cü illər aralığında “Kuban”a məxsus olsa da, bu klubun heyətində heç cür möhləmlənə bilməyib. İcarə əsasında Nalçik “Spartak”ı və “Volqar”da çıxış etdikdən sonra 27 yaşlı qapıçı son olaraq vətənində - “Dinamo-Avto”da forma geyib. 2007-ci ildən bu günə kimi Moldova millisinə dəvət alan Namaşko, yığmada meydana çıxdığı 40 oyunda qapısında 55 qol görüb.