“Rəşad Sadiqov iyunun 24-də “Xəzər Lənkəran”ın düşərgəsində olacaq”

“Rəşad Sadiqovla bütün məsələlərdə razılıq əldə olunub. Bu gün axşam, ya da sabah o, rəsmi müqaviləyə imza atacaq. İyunun 24-də digər futbolçular kimi Rəşad da komandamızın Ərzurumdakı təlim-məşq toplanışına qatılacaq”. Futbolxeber.az saytına verdiyi açıqlamada bu sözləri “Xəzər Lənkəran”ın mətbuat xidmətinin rəhbəri Hüseyn Cəbrayıloğlu deyib.

Klub rəsmisi Vaqif Cavadovla Rauf Əliyevin durumuna da aydınlıq gətirib: “Vaqif Cavadovun xidmətində əvvəlki baş məşqçimiz maraqlıydı. Amma məlum dəyişilikdən sonra Cavadovun keçidi gündəmdə deyil. O, Oğuz Çətinin siyahısında yer almayıb. Rauf Əliyevi transfer etmək istəyirik. Lakin onun “Bakı” ilə müqaviləsi var ki, bu da keçidi çətinləşdirir”.