Yaşar Seyidov: “Atletiko” yaxşı günümüzdə də yanımızda olur, pis günümüzdə də”

“Atletiko” yaxşı günümüzdə də yanımızda olur, pis günümüzdə də. Bu gün müstəqillik gününü qeyd edirik. “Atletiko” isə çempionluq kuboku ilə Bakıya təşrif buyurub. Onlar fevralın 26-da, Xocalı soyqırımı günündə də Azərbaycanı unutmamışdılar”. Futbolxeber.az-ın məlumatına görə, bu sözləri “Bakı”nın vitse-prezidenti Yaşar Seyidov deyib.

“Atletiko”nun Bakıya səfərinə həsr olunmuş mətbuat konfransını giriş sözü ilə açıq elan edən Y.Seyidov Madrid klubunun ötən il ölkə prezidenti İlham Əliyevlə görüşünü də xatırlayıb: “Ötən il “Atletiko”nun Bakıya səfəri zamanı qonaqlar cənab prezident İlham Əliyevlə görüşdülər. Bu görüşdən bir neçə gün sonra “Atletiko” İspaniya kubokunu qazandı. Bu il isə onlar La Liqanın qalibi oldular. Hafiz müəllim başda olmaqla hər birimiz “Atletiko”yla əməkdaşlıqdan məmnunuq. İnanıram ki, “Atletiko” gələcəkdə də uğur qazanacaq. Bu əməkdaşlıq Azərbaycan-Ispaniya münasibətlərinin inkişafında böyük rol oynayır. Bütün bu uğurların memarı dövlət başçımız İlham Əliyevdir. Azərbaycanın adı daim qalib olmalı, zirvədə yer almalıdır”.