Özkara: “ABŞ-la oyundan hər birimiz maksimum nəticə ilə ayrılmaq istəyirik”

“Toplanışımız yüksək səviyyədə təşkil olunub. Komanda daxilində ab-hava çox yaxşıdır. Tək çətinliyimiz saat fərqinin olmasıdır. Buna da uyğunlaşmağa çalışırıq. Məşqlərimiz çox intensiv şəkildə davam edir. Oyuna qədər tam hazır olmalıyıq”. Futbolxeber.az-ın məlumatına görə, bu sözləri millimizin hücumçusu Cihan Özkara deyib.

ABŞ-a qarşı keçiriləcək oyun barədə AFFA-nın rəsmi saytına danışan Özkara rəqib haqda dolğun məlumata sahib olduqlarını bildirib: “ABŞ yığması haqda kifayət qədər məlumatımız var. Yurgen Klinsmanın komandası Braziliyada təşkil olunacaq dünya çempionatında iştirak edəcək. Bu qarşılaşma həm onlar, həm də bizim üçün əhəmiyyətlidir. ABŞ millisi üçün dünya çempionatı öncəsi son sınaqlardan biridirsə, bizim üçün güclü rəqiblə oyunda hazırlığımızın hansı səviyyədə olmasını bilməyimiz baxımından vacibdir. Təbii ki, hər birimiz çalışıb bu görüşdən maksimum nəticə ilə ayrılmaq istəyirik”.