“Foqtsdan dəvət gözləyirdim” (Müsahibə)

21 yaşadək futbolçulardan ibarət milli komandamızın və “Sumqayıt”ın qapıçısı Andrey Popoviç Futbolxeber.az saytına müsahibə verib.  

- İyunun 1-də AVRO-2015-in seçmə mərhələsində Norveçlə qarşılaşacaqsınız. Hazırlıqlar necə gedir?

- Hər şey qaydasındadır. Artıq bir neçə gündür təlim-məşq toplanışına yığışmışıq. Ciddi şəkildə oyuna hazırlaşırıq.

- Komandada əhval-ruhiyyə necədir?

- Vəziyyət yaxşıdır. Məşqlər də yüksək əhval-ruhiyyədə keçir.  

- Norveçi səfərdə məğlub etmişdiniz. Eyni uğuru Bakıda da təkrarlamaq mümkün olacaq?

- Buna ümid edirik. Məqsədimiz qələbə qazanmaqdır. Amma çox çətin oyun olacaq.

- Cari tsikldə millimiz öz meydanında bir qol belə vura bilməyib. Aydın məsələdir ki, belə olan halda qələbə də qazana bilməmişik. Bunun səbəbini nədə görürsən?

- Evdə cəmi 2 oyun keçirmişik. Norveçlə qarşılaşma üçüncü olacaq. Öz meydanımızda Portuqaliyaya uduzduq. Rəqib çox güclüdür. Hazırda qrupun vahid lideri olması da Portuqaliyanın gücünü göstərir. O ki qaldı Makedoniyaya, onları evdə məğlub etməliydik. Sadəcə, bəxtimiz gətirmədi. İnanıram ki, Norveçlə oyunda bu uğursuzluğa son qoyacağıq.

- Millimiz bu qrupda üçüncü yeri tuta bilər?

- Bizim məqsədimiz də elə üçüncü olmaqdı. Buna inanırıq. Əlimizdən gələni də edəcəyik ki, heç olmasa üçüncü yeri tutaq.

- Norveçlə oyun üçün qarşınızı hansı məqsəd qoyulub?

- Yalnız qələbə. Hər kəs bu oyundan 3 xal istəyir.  

- Klub karyeranla bağlı nə yenilik var?

- Hələ bir yenilik yoxdur. “Sumqayıt”la daha 1 illik müqaviləm var. Heç bir klubdan da təklif almamışam.

- Deməli, “Sumqayıt”da qalacaqsan...

- Baxacağıq.

- Əsas millinin ABŞ-la oyun üçün açıqlanan heyətində yer almadın. Bu barədə nə deyə bilərsən?

- Bilmirəm. Bu, Foqtsun qərarıdır.

- Həmişə “Sumqayıt”ın əsas heyətində yer alırsan. Amma Foqtsun dəvət göndərdiyi qapıçılardan heç də hamısı öz klublarında əsas heyətə düşmürlər...

- Sözün açığı, Foqtsdan dəvət gözləyirdim. Amma o, məni çağırmamaq qərarına gəldi. Bir daha təkrar edirəm ki, bu baş məşqçinin qərarıdır və bu barədə heç nə deyə bilmərəm.

ELMAN