"Qəbələ" üç futbolçusu ilə yolları ayırdı

"Qəbələ" üç futbolçusu ilə rəsmən yolları ayırıb. Bu haqda klubun baş meneceri Zaur Əzizov məlumat verib. Onun sözlərinə görə, mətbuatda bir neçə futbolçunun "Qəbələ"dən gedəcəyi deyilsə də, hələlik yarımmüdafiəçi Rodriges Asis, qapıçı Dieqo Koşta və "Portu"dan icarə əsasında komandaya cəlb edilən Marat İzmaylovun "Qəbələ"dən gedəcəyi dəqiqləşib: "Hazırda baş məşqçimiz olmadığı üçün bəzi futbolçular haqda qərar verilməyib. Ancaq Rodriqes Asis və Dieqo Koştanın müqaviləsi başa çatıb. Onlar komandadan gedəcəklər. Marat İzmaylov isə icarə müqaviləsi başa çatdığı üçün məxsus olduğu "Portu" klubuna qayıdır. Yeni baş məşqçimiz təyin olunduqdan sonra yenidən Maratı komandaya cəlb edə bilərik". 

"Qəbələ"nin aparıcı futbolçularından olan Dodo dünən keçirilən kubokun final oyunundan sonra mətbuata açıqlamasında "Qəbələ"dən gedəcəyini deyib. Məsələyə münasibət bildirən Z.Əzizov  braziliyalı futbolçunun xidmətində maraqlı olduqlarını və ona yeni müqavilə təklif olunacağını qeyd edib.