“İnter” yeni mövsümün hazırlığına Türkiyədə start verəcək

“İnter” yeni mövsümün hazırlığına Türkiyədə start verəcək. Bu haqda Futbolxeber.az saytına “bankirlər”in mətbuat xidmətinin rəhbəri Səbuhi Məmmədov məlumat verib: “Komanda Türkiyədə toplanacaq. Amma hələlik dəqiq tarix bəlli deyil. Çox güman ki, iyunun 1-də komanda bir araya gələcək. Ötən il Kartepeyə getmişdik. Bu il də eyni məkan olacaq. Hazırlığın ilk mərhələsi təxminən 10 gün çəkəcək. Sonra 2-3 gün fasilə olacaq. Fasilə müddətində ötən il əcnəbilər ölkələrinə, yeli futbolçular da vətənə üz tutmuşdular. Böyük ehtimalla, bu il də eyni cür olacaq. Daha sonra isə hazırlığın ikinci mərhələsi start götürəcək. Bu dəfə komanda Avropa ölkələrinin birində təlim-məşq toplanışı keçəcək. Lakin həmin məkan hələ ki bəlli deyil. Bir daha deyirəm ki, hazırlıq planı hələ təsdiqlənməyib. Yalnız ümumi söhbət olub”.