Böyükağa Hacıyev: “Simurq”a qarşı oyun da çox çətin keçəcək”

“Rəvan”la qarışıq oyun alındı. Çoxsaylı qol imkanları yaratmağımıza baxmayaraq, həlledici vuruş çatışmırdı. Rəqib iki hissə ərzində qapımıza bir zərbə vurdu, o da qol oldu”. Futbolxeber.az-ın məlumatına görə, bu sözləri “Rəvan”la oyundan sonra “Neftçi”nin baş məşqçisi Böyükağa Hacıyev deyib.

B.Hacıyev “Simurq”la oyunlarının daha çətin keçəcəyini bildirib: “Oyunun gərgin keçəcəyini gözləyirdim. Medallar uğrunda qızğın mübarizə getdiyi kimi Premyer Liqada qalmaq üçün də “Sumqayıt”la “Rəvan” mübarizə aparır. Yaxşı ki, son anda futbolçular özlərində güc tapıb son nöqtəni qoya bildilər. Artıq çempionatın sonuna bir tur qalıb. “Simurq”a qarşı oyun da çox çətin keçəcək. Çünki, üçüncü yerin sahibi məhz bu oyunlarda müəyyən olunacaq. “Sumqayıt” çempionu məğlub etdi, bu, futbolda olan haldır”.