Syominlə 50-ci qol - Uğurlu seriya təkrarlandı

Azərbaycan Premyer Liqasının XXXIII turunda “Neftçi”ni 2:1 hesabı ilə məğlub edən “Qəbələ” mövsümdə ən uğurlu seriyasını təkrarladı. Futbolxeber.az-ın klubun rəsmi saytına istinadən verdiyi məlumata görə, V-VII və XIV-XVI turlarda 3 qələbəni sıralayan Yuri Syominin yetirmələri mövsümdə 3-cü dəfə belə uğura imza atdı. Bu qələbə ilə komanda “ağ-qaralar”la matçlardakı uğursuz seriyaya son qoydu. Ardıcıl 3 dəfə uduzan, son 5 görüşdə qalib gələ bilməyən “Qəbələ” 2012-ci il noyabrın 3-də qeydə alınan qələbədən 545 gün sonra qalib gəldi.

Qazanılan qələbə sayəsində “Qəbələ” sona 3 tur qalmış çempionatdakı ən yüksək nəticəsini təmin etdi. Belə ki, “qırmızı-qaralar” ən pis halda, çempionatı 5-ci pillədə başa vuracaq. Bu isə 2011/12 mövsümünə təsadüf edən rekordun təkrarı olacaq. Daha yüksək yerlər uğrunda mübarizə aparan Syominin komandası 3 və ya 4-cü yeri tutmaqla isə tarixinin ən yaxşı nəticəsini göstərəcək.

Luis Hilario bakılılarla qarşılaşmalarda 4-cü qolunu vurub bu duellərdə “qırmızı-qaralar”ın ən məhsuldar oyunçusu oldu. Lorenzo Ebesilio isə mövsümün 4 görüşündən 3-də bakılıları məyus edib. Ən maraqlısı isə bu 4 matçın hamısı eyni – 2:1 hesabı ilə başa çatıb. 3 dəfə paytaxt klubu, 1 dəfə qəbələlilər qalib gəlib.

Lorenzo Ebesilionun vurduğu qol “Qəbələ”nin Yuri Syominin rəhbərliyi altında vurduğu 50-ci qol oldu. Bu topların 42-si Premyer Liqa, 8-i kuboka təsadüf edib.

“Qəbələ” bir çempionatda qazanılan qələbə (16), və qazanılan xal (54) sayında mütləq rekorda imza atdı. Komanda 2011/12 mövsümündəki 15 qələbə və 52 xal rekordunu üstələdi.

Səfərdə qol sayını 21-ə çatdıran Syominin komandası 2011/12 mövsümündəki 19 qolluq rekordu yenilədi.

“Qəbələ”də 18-ci qolunu vuran Luis Hilario Kənan Kərimova çatdı. İndi braziliyalı yalnız Viktor Mendi (24) və Rövşən Əhmədovdan (20) geri qalır. Premyer Liqada isə Luis Hilario 16 qolla 2-ciliyi bölür. O, özü ilə eyni sayda qol vuran Yannik Kamananla birlikdə yalnız Mendidən (20) geri qalır.