Azərbaycan - Norveç matçının da stadionu məlum oldu

Futbol üzrə Azərbaycan milli komandasının 2016-cı il Avropa çempionatının seçmə qrup mərhələsində bu il keçirəcəyi daha bir ev oyununun stadionu müəyyənləşib. Lent.az-ın xəbərinə görə, millimiz Norveç yığmasını noyabrın 16-da Tofiq Bəhramov adına Respublika stadionunda qəbul edəcək.

 

Matç saat 21:00-da başlanacaq. Artıq AFFA rəsmiləri Respublika stadionunun rəhbərliyini bu barədə məlumatlandırıb. Komandamızın Bolqarıstanla keçirəcəyi ilk seçmə oyununun isə sentyabrın 9-da “Bakcell Arena”da baş tutacağı rəsmən açıqlanıb. 

 

Mərkəzi arenanın direktoru Akif İsmayılov Lent.az-a açıqlamasında xəbəri belə şərh edib: “Bu yaxınlarda AFFA-nın baş katibi Elxan Məmmədov mənə deyib ki, yığmamızın builki ev oyunlarından ən azı 1-i Respublika stadionunda keçiriləcək. Hətta bu yaxınlarda Norveç Futbol Federasiyasının nümayəndələri “Bakcell Arena” ilə yanaşı, bizim stadiona da baxış keçiriblər. Bu il yığmamız cəmi 2 ev oyunu keçirəcək. Onlardan Bolqarıstanla matçın stadionu artıq məlumdursa, deməli, digər qarşılaşma Respublika stadionunda olacaq. AFFA rəsmisinin mənə dediklərinə əsasən belə qənaətə gəlmək olar. Amma yenə də qərar onlarındır”.

 

Qeyd edək ki, Bolqarıstan və Norveçlə ev oyunlarından əlavə, yığmamız bu il oktyabrın 10-da İtaliya, oktyabrın 13-də isə Xorvatiya ilə səfər matçlarına çıxacaq.