Nikolas Kanales “Neftçi”nin yalanını üzə çıxardı

Ötən mövsüm Premyer Liqanın ən məhsuldar hücumçusu olan Nikolas Kanalesin Azərbaycana qayıdışı baş tutmaya bilər. Apasport.az saytının məlumatına görə, sabiq futbolçusunu geri qaytaracağı gözlənilən “Neftçi” hələlik bu istiqamətdə heç bir addım atmayıb.

“Ağ-qaralar”ın baş məşqçisi Böyükağa Hacıyev fevralın sonlarında keçirdiyi mətbuat konfransında Çili millisinin sabiq hücumçusunun yenidən heyətə qaytarılacağını demişdi. Onun “Kanales gələn mövsüm bizə gəlir” deməsi isə hələlik quru sözdən başqa bir şey deyil.

Bunu Nikolas apasport.az saytına açıqlamasında bildirib. 28 yaşlı hücumçu “Neftçi”yə dönmək perspektivinə qısa cavab verib: “Sabiq komandamdan heç bir təklif almamışam”.

Qeyd edək ki, 26 qolla Azərbaycan çempionatının bombardiri olmuş Kanales hazırda ölkəsinin “Kolo-Kolo” klubunun futbolçusu olsa da, “Santyaqo Uonderers”ə icarəyə verilib.