“Xəzər Lənkəran” Qəbələdə məskunlaşıb

Premyer Liqanın XXX turunda səfərdə “Bakı” ilə 2-2 hesablı bərabərliyə qalan “Xəzər Lənkəran” Qəbələyə yola düşüb. Futbolxeber.az-ın klubun rəsmi saytına istinadən verdiyi məlumata görə, Azərbaycan kubokunun ilk yarımfinal qarşılaşmasında “Qəbələ” klubunun qonağı olacaq “Xəzər Lənkəran” “Qafqaz Resort” otelində məskunlaşıb. Axşam saatlarında “Qəbələnd” istirahət mərkəzinin təbii örtüklü meydançasında komanda ilk məşqinə çıxaraq hazırlığına start verib.

Bu gün adıçəkilən məkanda növbəti məşqinə çıxacaq “Xəzər Lənkəran” sabah Qəbələ şəhər stadionunda oyunöncəsi son məşqinə çıxaraq oyun saatını gözləyəcək.

Xatırladaq ki, Azərbaycan kubokunun “Qəbələ”- “Xəzər Lənkəran” yarımfinal qarşılaşması 16 apreldə saat 16-da start götürəcək.