AZAL-ın yeni məşqçisi “İnter”dən gedişini şərh etdi

“İnter” PİK U-19 komandasının baş məşqçsi Vadar Nuriyevlə vidalaşıb. Futbolxeber.az-ın klubun rəsmi saytına istinadən verdiyi məlumata görə, V.Nuriyev “İnter” U-19 komandasına mövsümün əvvəlindən rəhbərlik etməyə başlamışdı, bundan öncə klubun müxtəlif yaş qruplarıyla çalışmışdı. V.Nuriyev klubla vidalaşmasını belə şərh edib: “Bilirsiniz, “İnter” mənim üçün xüsusi klubdur. Mən uzun müddət burada çalışmışam və bu müddət ərzində hamıyla yaxşı münasibətlərim formalaşıb. Bu yaxınlarda AZAL klubunun əsas komandasının məşqçilər heyətində çalışmaq təklifini aldım. “İnter”in rəhbərliyi məni buraxdı və buna görə minnətdarlığımı bildirirəm. Xoşdur ki, məni anladılar. Mənə göstərilən etimada görə klub rəhbərliyinə təşəkkür edirəm və “İnter”ə uğurlar arzulayıram”.

Xatırladaq ki, “İnter” U-19 komandasının yeni baş məşqçisinin adı yaxın günlərdə məlum olacaq.