“Simurq” “Bakı“ önünə 4 itkiylə çıxacaq

Sabah Azərbaycan Premyer Liqasının 28-ci turu çərçivəsində "Bakı"nın qonağı olacaq “Simurq”, bu gün qarşılaşmanın keçirələcəyi meydançada son məşqinə çıxıb. Futbolxeber.az-ın klubun rəsmi saytına istinadən verdiyi məlumata görə, bir saata yaxın davam edən hazırlıq prossesində sarı vərəqə limitini dolduran Rəşad Eyyubov və zədə səbəbindən qarşılaşmada forma geyinə bilməyəcək Patrik Osiako, Usim Nduka və Mindauqas Kalonas iştirak etməyib.

Dördüncü dövrənin ilk matçında paytaxt təmsilçisi ilə üz-üzə gələcək “Simurq”, cari mövsümün geridə qalan hər üç oyununda rəqibdən üstün ola bilməyib. Sonuncu dəfə bu arenada Georgi Çixradzenin yetirmələri 3:2 hesabı ilə məğlub olub. Avroliqa uğrunda mübarizə aparan komanda üçün bu görüş çox böyük əhəmiyyət daşıyır. Turnir cədvəlində ondan irəlidə olan kollektivlərlə arasındakı xal fərqini azaltmaq üçün "Simurq" qarşılaşmadan xalsız ayrılmamalıdır. Demək olar ki, sabahkı qarşılaşma Zaqatala təmsilçisi üçün son ümid, son şansdır. 

Qeyd edək ki, "Bakı" - "Simurq" oyunu saat 15:00-da start götürəcək və "Simurq TV" vasitəsilə canlı yayımlanacaq.