Kiyev “Dinamo”su “Neftçi”yə oyunu necə satdı? - TƏFƏRRÜATLAR

Kiyev “Dinamo”sunun sabiq futbolçusu Viktor Serebryanikov 1966-cı il SSRİ çempionatının sonlarında “Neftçi”yə 1:2 hesablı məğlubiyyətlə bağlı şok açıqlamalar verib. Lent.az martın 29-da 74 yaşını qeyd edəcək Serebryanikovun “Sport-Ekspress”ə müsahibəsindən həmin hissəni təqdim edir...

- Bir dəfə “Ded” ləqəbli baş məşqçiniz Viktor Maslovu ağlamaq həddinə gətirmisiniz...

- 1966-cı ildə. “Neftçi” və OİK gümüş medal uğrunda vuruşurdular. “Neftçi”nin Kiyevdə matçı var idi. Oyun öncəsi axşam bazamıza yeniyetmələrdən ibarət yığmada birgə çıxış etdiyimiz uşaqlar – Banişevski, Markarov və Bruxti gəldilər. Aydındır, onlara oyun lazım idi. Cavab verdim: “Komanda ilə məsləhətləşəcəyəm. “Ded”ə deməyəcəyəm”.

- Nə üçün?

- Maslov daha öncə OİK-in məşqçisi olmuşdu. Aydındır ki, bu mübarizədə Rostov komandasının tərəfində idi. Mənə çuval uzatdılar. Hətta təsəvvür etmirəm ki, orada nə qədər var idi. Əsas heyətin 11 futbolçusunu yığdıq. Oyunu versək, elə indicə pulları bölüşdürəcəyik. Xeyr - qaytarırıq. Hamı lehinə səs verir. Bu zaman gözlənilmədən Bışovetsin səsi gəlir.

- Nə deyir?

- Deyir: “Qardaşlar, birdən Şerbitski xəbər tutar?” Cavab verirəm: “Sən deməsən, kim biləcək? İstəmirsənsə, tamam, pulları qaytarıram”. Çuvalla çıxışa yönəlirəm. Bışovets dalımca qaçaraq, köynəyimdən tutur. Az qala cıracaqdı: “Zarafat edirdim. Gəl bura!” Hamımız birgə “Neftçi”nin qaldığı “Moskva” mehmanxanasına gedirik. Razılaşırıq ki, bizi bir top fərqi ilə udsunlar. Lakin Bışovets meydanda möcüzə etməyə başlayır. Bombardir olmağa can atırdı. Pulu götürsə də, qol vurur. Hər halda biz 1:2 hesabı ilə uduzduq.  “Ded” heç bir söz demədən maşına oturdu və getdi. Ağlayırdı. Biz onu satmışdıq.

- Heç olmasa, puldan Maslova çatdı?

- Onun payı məndə idi. Ona zəng etdim: “Viktor Aleksandroviç...”. O isə “Lənətə gəlmiş əclaf!”cavabını verdi. Mən isə soruşdum: “Gəlmək olar?” Ona hər şeyi danışdım. Həm razılaşmamız, həm də Bışovets barədə. Çuvalcığı verdim. İçərisində 1500-dən bir qədər çox pul qalmışdı. O, ortalıqda hansı məbləğin olduğunu gördükdən sonra şokda idi: “Məni içəri basacaqlar!”.

Qeyd edək ki, 1966-cı il SSRİ çempionatında Kiyev “Dinamo”su 56 xalla qızıl, Rostovun OİK komandası 47 xalla gümüş, “Neftçi” 45 xalla bürünc medal qazanıb. “Spartak” isə 42 xalla 4-cü yeri tutub. “Dinamo” - “Neftçi” matçı sona 3 tur qalmış - noyabrın 16-da keçirilib. Komandamız Kiyevdə 2:1 hesablı qələbə qazanıb. Ardından son 2 turda “Neftçi” Bakıda əvvəlcə Moskva MOİK-i ilə qolsuz heç-heçəyə, ardından “Spartak”la görüşdə 3:0 hesablı qələbəyə nail olub.