"Qalatasaray" UEFA-dan təzminat tələb edəcək

"Qalatasaray"ın futbolçusu Noa Lanq UEFA Çempionlar Liqasının 1/8 final mərhələsində "Liverpul"la keçirilən cavab oyununda ciddi zədə alıb.

Futbolxeber.az saytının məlumatına görə, matçın gedişatında 26 yaşlı niderlandlı futbolçunun əli meydançanın kənarında quraşdırılan reklam tablosuna dəyib və barmağı dərin kəsilib. Nəticədə o, əvəzlənməli olub. Klubun açıqlamasına görə, oyunçu əməliyyat ediləcək.

Hadisədən sonra “Qalatasaray” UEFA-ya rəsmi şikayət edib. Klubun baş katibi Eray Yazqan bildirib ki, məsələ ilə bağlı quruma müraciət olunub və təzminat tələbi irəli sürüləcək.

“Matçdan sonra UEFA nümayəndələrinə şikayət etdik. Onlar da araşdırma apardılar. Məsələni UEFA qiymətləndirəcək. Hüquqşünaslarla işləyirik və təzminat tələb edəcəyik”, – deyə Yazqan vurğulayıb.