“Almaniya favoritlərdən biridir, təəssüf ki, onlarla bu gün qarşılaşacağıq”

Danimarka milli komandasının baş məşqçisi Kasper Yulmann bu gün Avro-2024-ün 1/8 final mərhələsi çərçivəsində Almaniyaya qarşı keçirəcəkləri oyundan danışıb.

Futbolxeber.az saytının məlumatına görə, 52 yaşlı mütəxəssis bildirib ki, rəqib qələbə qazanmaq üçün çox əziyyət çəkməli olacaq: “Hələ əvvəldən düşünürdüm ki, Almaniya yığması turnirin əsas favoritləri sırasındadır. Çox təəssüf ki, onlarla artıq bu gün qarşılaşmalıyıq. Ustalıq və futbolçuların istedadı onların yerinə danışır. Lakin eyni sözləri bizim haqqımızda da demək olar. Odur ki, almanlar bizi məğlub etmək üçün çox əziyyət çəkməli olacaqlar”.

Yulmann danimarkalı qeyd edib ki, komandası özünə inanmalıdır: “Qrup oyunlarında stadionda xeyli sayda danimarkalı azarkeşi görmək çox xoş idi. Ümid edirəm ki, onlar bu gün də bizi tək qoymayacaqlar. Təbii ki, stadionda yerli azarkeşlər çoxluq təşkil edəcəklər. Biz səfər atmosferində oynayacağıq. Özünə və gücünə inanmaq çox vacibdir. Son illər biz güclü rəqiblərə qarşı çox oyun keçirmişik və hər bir halda biz gücümüzü göstərmək üçün əlimizdən gələni etmişik”.

Xatırladaq ki, bu gün keçiriləcək Almaniya - Danimarka matçı Bakı vaxtı ilə 23:00-da start götürəcək.