Gürcüstanın Baş naziri futbolçulara müraciət etdi: “Azarkeşlər 30 ildir bu günü gözləyirdilər”

Gürcüstanın Baş naziri İrakli Kobaxidze Avro-2024-dəki ilk oyun öncəsi ölkə millisinin futbolçularına müraciət edib.

Futbolxeber.az saytının məlumatına görə, Gürcüstan hökumətinin mətbuat xidmətinin yaydığı açıqlamada deyilir:

“Gürcü azarkeşlər 30 ildir bu günü gözləyirdilər. Bu gün ilk dəfə olaraq Avropa çempionatında Gürcüstanın bayrağı dalğalanacaq və dövlət himni səslənəcək. Hər birimiz bununla fəxr edirik. Yaşadığımız hissləri sözlə ifadə etmək çətindir. Mən komandamıza inanıram. Necə ki, martın 26-da futbolçuların ürəklərini meydanda qoyacaqlarına və Gürcüstana tarixi qələbə qazandıracaqlarına əmin idim. İnanıram ki, Gürcüstan bu gün qalib gələcək!”

Qeyd edək ki, Gürcüstan millisi Avro-2024-dəki ilk matçında bu gün Bakı vaxtı ilə 20:00-da Türkiyə millisi ilə üz-üzə gələcək.