Şahruddinin komandası “Beşiktaş” üzərində qələbəyə sevindi

Türkiyə Superliqasında üçüncü turdan təxirə salınmış bir oyun keçirilib.

Futbolxeber.az saytının məlumatına görə, millimizin qapıçısı Şahruddin Məhəmmədəliyevin formasını geydiyi “Adana Demirspor” öz meydanında “Beşiktaş”ı qəbul edib.

Ölkə çempionatının reqlamenti səbəbindən Şahruddin bu matçda forma geyə bilməyib. Belə ki, qaydalara əsasən, 29 yaşlı qolkiper sözügedən görüşün keçirilməli olduğu tarixdən (28 avqust) sonra transfer edildiyi üçün meydana çıxa bilməyib. Təcrübəli qapıçı ilə yanaşı, daha 6 futbolçu analoji səbəbdən İstanbul nəhəngi ilə qarşılaşmanı buraxıb. Heyətdəki itkilərə baxmayaraq, Adana təmsilçisi “Beşiktaş”ı 4:2 hesabı ilə məğlub edib.

Belhanda, Nianq, Akbaba və Erdoğanın qolları “Adana Demirspor”a qələbə qazandırıb.

Mövsümdə üçüncü dəfə meydanı qalibiyyətlə tərk edən Şahruddinin komandası xallarının sayını 11-ə çatdırmaqla turnir cədvəlində üçüncü pilləyə yüksəlib. Adana təmsilçisi lider “Qalatasaray”dan 5, 1 oyun az keçirmiş “Fənərbaxça”dan isə 4 xal geri qalır.