Əliyar Ağayevin idarə etdiyi oyunda İngiltərə sevindi

Azərbaycanın FİFA referisi Əliyar Ağayev 21 yaşadək futbolçulardan ibarət milli komandalar arasında keçirilən Avropa çempionatında İngiltərə - Almaniya oyununu idarə edib.

Futbolxeber.az saytının məlumatına görə, C qrupunun 3-cü turu çərçivəsində, "Batumi Arena"da keçirilən görüş İngiltərənin 2:0 hesablı qələbəsi ilə başa çatıb. Hesabı 4-cü dəqiqədə Kris Arçer açıb. İngiltərənin 2-ci qolunu isə 21-ci dəqiqədə Harvi Elliot vurub.

Bu oyunda Əliyar Ağayevə yan xət hakimləri qismində Zeynal Zeynalovla Akif Əmirəli kömək ediblər. Ağayev matçda 1 sarı vərəqə göstərib. O, 74-cü dəqiqədə Eşli Koliyə (İngiltərə) xəbərdarlıq edib.

Qeyd edək ki, maksimum nəticə göstərən İngiltərə 9 xalla C qrupunun lider kimi tamamlayıb. Almaniya isə 1 xalla sonuncu olub. İkinci yeri 4 xalla İsrail yığması tutub. Çexiya isə 3 xalla üçüncü olub.

Qeyd edək ki, Əliyar Ağayev Gürcüstan və Rumıniyada təşkil olunan Avropa çempionatında daha əvvəl A qrupunda açılış matçını - Belçika - Niderland (0:0) oyununu idarə edib, C qrupunun 2-ci turunda isə Çexiya - Almaniya matçının (2:1) 4-cü hakimi olub.

Futbolxeber.az-ın teleqram kanalına abunə olun