Krivostsyukun komandası qələbə həsrətinə son qoydu

Cənubi Koreya çempionatında 12-ci tura yekun vurulub.

Futbolxeber.az saytının məlumatına görə, milli komandamızın müdafiəçisi Anton Krivostsyukun formasını geydiyi “Daejeon” öz meydanında “Suvon FC”ni qəbul edib.

Meydana start heyətində çıxan Krivotsyuk görüşü əvəzolunmadan keçirib. Matç onun komandasının 2:1 hesablı qələbəsi ilə başa çatıb. “Daejeon”a qələbə gətirən qolları 16-cı dəqiqədə Masatoşi İşida və 57-ci dəqiqədə Jeon Byunq-Kvan vurub. Bununla da millimizin üzvünün komandası 2 turdan sonra qələbə qazanmağa müvəffəq olub. “Daejeon” son turda cəmi 1 xal toplaya bilmişdi.

Bu qələbə sayəsində xallarının sayını 21-ə çatdıran Krivotsyukun komandası turnir cədvəlində üçüncü pilləyə yüksəlib. “Daejeon” ikinci pillədəki “Seul”dan cəmi 2 xal geri qalır. Turnir cədvəlinə isə 31 xala malik “Ulsan Hunday” başçılıq edir.