Pioli “Roma” ilə heç-heçə barədə: “Bu, gözlədiyimiz nəticə deyil”

“Milan”ın baş məşqçisi Stefano Pioli A seriyasının 32-ci turunda “Roma”ya qarşı keçirilən oyunu (1:1) şərh edib.

Futbolxeber.az saytının məlumatına görə, təcrübəli mütəxəssis qeyd edib ki, heç-heçə onun gözlədiyi nəticə deyildi:

“Pis oynamadıq. Amma lazımi anda düzgün qərarlar qəbul edə bilmirdik. Düzdür, topa nəzarət daha çox bizim tərəfimizdə idi. Amma yaxaladığımız şansları dəyərləndirə bilmədik. Bilirik ki, “Roma” öz meydanında çox az qol buraxır. Dəqiqələr keçdikcə rəqib qapısına yol tapmaq daha da çətinləşirdi. Bu, gözlədiyimiz nəticə deyil. Amma yaxşı ki, son saniyələrdə məğlubiyyətdən qaça bildik. Çünki oyunumuzu nəzərə alsaq, məğlubiyyət bizim üçün çox pis nəticə olardı. Yaxşı formadayıq və buna görə mən qələbəyə inanırdım. Həm də bu, çox qəribə oyun idi. Çünki matç ümumilikdə 106 dəqiqə davam etsə də, onun cəmi 49 dəqiqəsində top meydanda idi. Daimi fasilələrlə mübarizə aparmaq çox çətin idi”.