De Liqt komandasının oyununu tənqid etdi

“Bavariya”nın müdafiəçisi Matteys De Liqt komandasının Bundesliqanın 28-ci turunda “Hoffenhaym”a qarşı keçirdiyi oyunu tənqid edib.

Futbolxeber.az saytının məlumatına görə, niderlandlı müdafiəçi 1:1 hesablı heç-heçəni belə şərh edib:

“Bu oyundan sonra “Mançester Siti” ilə cavab matçında nəyə ümid etmək olar? Yəqin ki, bundan da pis oynamağımız mümkün deyil. İntensivlik nümayiş etdirmədik, enerji sərf etmədik. Bəxtimiz gətirdi ki, matç elə 1:1 yekunlaşdı. Düzdür, “Mançester Siti” ilə görüş fiziki və psixoloji cəhətdən bizi çox yordu. Amma bu, bizə haqq qazandırmır. Əgər sən “Bavariya”nın futbolçususansa, 3 gündən bir yaxşı oynamağa məcbursan. Ümid edirəm ki, “Mançester Siti” ilə cavab oyununda 100 faiz gücümüzü meydanda qoya biləcəyik”.

Xatırladaq ki, “Bavariya” və “Mançester Siti” arasında cavab oyunu aprelin 19-da keçiriləcək.