Xavi: “Mən onun uğur qazanmasını hamıdan çox istəyirəm”

“Barselona”nın baş məşqçisi Xavi komandasının hücumçusu Ansu Fatinin atasının sözlərinə münasibət bildirib. Bori Fati oğlunun komandadakı durumundan narazılığını ifadə edib.

Futbolxeber.az saytının məlumatına görə, ispan mütəxəssis Ansu Fatinin uğur qazanmasını arzuladığını bildirib:

“Ansu Fati sakitdi və fikrini işinə yönəldib. Məni yalnız futbolçum maraqlandırır. Onun atası, yaxud ətrafı yox. Başa düşürəm, valideyn olaraq atası övladı üçün narahat olur. Lakin mən Ansuya güvənirəm. Dəfələrlə söhbətimiz olub. Mən onun uğur qazanmasını hamıdan çox istəyirəm”.

Qeyd edək ki, “Barselona”nın yetirməsi olan Fatinin 2027-ci ilin iyununa kimi “Barselona” ilə müqaviləsi var. Cari mövsüm 20 yaşlı futbolçu bütün turnirlər nəzərə alınmaqla 38 matça çıxıb və 6 qol vurub.