İranlı xanımlar Rusiya ilə oyuna stadiondan baxa bilərlər

İran milli komandasının öz meydanında Rusiya və Keniyaya qarşı keçirəcəyi yoxlama matçlarını qadınlar da stadiondan izləyə bilərlər.

Futbolxeber.az saytının məlumatına görə, bu haqda “MahrNews”a müsahibəsində İran Futbol Federasiyasının prezidenti Mehdi Tadc açıqlama verib:

“Biz ümid edirik ki, hər iki yoxlama matçında stadionda qadınlar da olacaq. Hazırda qadınların idman oyunlarını canlı izləmələri üçün qadağa yoxdu. Mən ölkə çempionatının təşkilatçılarından da xahiş edirəm ki, qadınların stadiona cəlb olunmasına çalışsınlar”.

Qeyd edək ki, İran millisi martın 23-də Rusiya, 28-də isə Keniya ilə yoxlama matçında üz-üzə gələcək.