İnzagi: “Portu” ilə cavab oyununa çox yaxşı hazırlaşmışıq”

“İnter”in baş məşqçisi Simone İnzagi Çempionlar Liqasının 1/8 finalında “Portu”ya qarşı keçiriləcək cavab  oyunundan gözləntilərini açıqlayıb.

Futbolxeber.az saytının məlumatına görə, italiyalı mütəxəssis səfər matçına çox ciddi hazırlaşdıqlarını bildirib:

“Bizi güclü rəqibə qarşı çətin oyun gözləyir. “Portu”da həm keyfiyyət var, həm də kəmiyyət. Onların istər hücum, istərsə də müdafiə xəttində kifayət qədər güclü futbolçuları var. Bilirik ki, “Portu” bir çox İtaliya klublarına problem yaradıb. Lakin biz qarşıdakı matça çox yaxşı hazırlaşmışıq. Portuqaliyalıların oyun tərzini hərtərəfli analiz etmişik. Ümid edirəm ki, səfərdə lazımi nəticəni qazanacağıq”.

Xatırladaq ki, “İnter” ilk matçda öz meydanında “Portu”nu 1:0 hesabı ilə məğlub edib.