Alleqri: “Meydanda 41, turnir cədvəlində isə 26 xalımız var”

“Yuventus”un baş məşqçisi Massimiliano Alleqri “A” seriyasının 21-ci turunda “Salernitana” üzərində qazanılan 3:0 hesablı qələbə barədə danışıb.

Futbolxeber.az saytının İtaliya mətbuatına istinadən verdiyi məlumata görə, təcrübəli mütəxəssis komandasının matçın ilk 1 saatı ərzində yaxşı oynadığını bildirib:

“Futbolçular “Montsa”dan alınan məğlubiyyətə yaxşı reaksiya göstərdilər. İlk 60 dəqiqədə çox gözəl çıxış etdik. Son yarım saatda isə rəqib qapımıza çox zərbə endirdi. Halbuki 90 dəqiqə ərzində konsentrasiyanı itirmək olmaz. Xüsusən son 30 dəqiqədə daha diqqətli olmaq lazımdır. Biz topa nəzarəti itirməklə rəqibi cəsarətləndiririk. Bu oyunda yaxşı futbol sərgiləmək yox, qələbə qazanmaq lazım idi”.

Alleqri turnir cədvəlindəki vəziyyətdən də danışıb: “Meydanda 41, turnir cədvəlində isə 26 xalımız var. Özümüzü rahat hiss etmək üçün 40 xal toplamalıyıq. Deməli, daha 16 xala ehtiyac duyuruq. Məqsədimiz turnir cədvəlində mümkün olduğu qədər yuxarı pillələrdə qərarlaşmaqdır”.

Qeyd edək ki, futbolçularla məxfi danışıqlar apardığına, maliyyə qaydalarını pozduğuna görə “Yuventus”un hesabından 15 xal silinib. Bu səbəbdən də komanda hazırda 26 xalla 10-cu pillədə qərarlaşıb.